Тетовските полицајци од утре започнуваат кампања со која целта е да се предупредат возачите да не управуваат возила под дејствот на алкохол и во празнични денови. Полицијата со летоци ќе ги убедува граѓаните да возат под дејство на алкохол со цел да не ја доведуваат во ризик сопствената и безбедноста на другите учесници во сообраќајот.
– Заедничка цел на оваа активност на СВР Тетово-Отсек за превенција е подигнување на сообраќајната свест и култура на возачите, дури и во највеселите-празнични и други мигови да се воздржат од управување на нивните возила под дејство на алкохол и да ја доведуваат во ризик сопствената и безбедноста на другите учесници, возачи и пешаци. Полициски службеници на Отсекот за превенција ќе делат наменски изработени летоци на македонски и албански јазик и освежувачи за возила. Станува збор за летоци со пораки:„Ако пиеш не вози, ако возиш немој да пиеш!“, „За весели моменти, насмевки и доживувања вози одговорно!“, „За тие што те сакаат и за тие што ги сакаш, почитувај ги сообраќајните правила и прописи“, „Љубовта оправдува многу нешта, но не и загрозување на безбедноста во сообраќајот“, информира портпаролот на СВР Тетово, Марјан Јосифоски.
Кампањата е насловена „Честит празник на љубовта и виното“, а ја реализираат заеднички Републичкиот совет за безбедност на сообраќајот на патиштата, Министерството за внатрешни работи и Факултетот за безбедност-Скопје.
ас
