Советот на Општина Тетово на денешната 14-та седница усвои предлог заклучок за усвојување на студија за основање на под-станици на Територијалната противпожарна единица. Со ова во иднина тетовската пожарна ќе добие објекти во руралните места кои ќе функционираат како подстаници од каде ќе тргнуваат пожарникари за интервенции.
-Едната подстаница ќе се формира со општините Теарце и Јегуновце. Втората е за Брвеница и Боговоиње заедно и третата ќе биде во Желино. Ова се прави за да пожарникарите што се во Тетово да се поделат во овие три рурални општини, нивната работа да биде поефикасна, за да можат да ги спречат што е можно повеќе непријатности поради пожари и други непогоди и несреќи, изјави Бесар Дурмиши претседател на тетовскиот Совет.
Сепак нема да има нови вработувања на пожарникари, а ќе има распределување во подстаниците. Според Дурмиши во моментот има над 100 пожарникари, од кои 85 се вработените на неопределно време.
-Нема да има нови вработувања. Постојните вработени пожарникари ќе се преселат и распределат. Има 85 на неопределено време вработени пожарникари и 15-20 со договор на дело. Со ова и другите општини се обврзани и задолжени да даваат плата за пожарникарите, рече Дурмиши.
На денешната седница беше одлучено Тетово да се збратими со Општина Бахчелиевлер, инаку дел од градот Истанбул.
ас