Комедијата „Вај-фај“ која ја изведоа актерите од Драмското студио Тетово беше прилика за повеќе од еден час постојано да се смее публиката дојдена на претставата.
Причина за смеа беа недоразбирањата и дијалозите на ликовите на Петре и Натка, шофер и домаќинка кои ги толкуваа Наташа Петровска и Лазар Саровски, со Санко и Јана кои се инженер и професорка, а ги играа Драгана Радованов и Глигорије Стојановски-а беа на тема нивните деца во Америка каде се венчале и планираат заеднички живот.
– Претставите се прават за публиката, а полна беше салата, задоволни сме од одзивот, од тоа како се однесуваше публиката за време на претставата. Се соживеа со ликовите кои ги толкуваа нашите актери и во најубаво сеќавање ќе им остана на нашите сограѓани и публика од други места. Ова беше комедија со тажни елементи, поради она што повеќето од нас што не засега децата што ни заминуваат во странство, остануваат тука старите луѓе и комуницираат со младите со „вај-фај“ со современата технологија. Можеби тоа го ублажува оној момент, затоа што отсекогаш постоело печалбарството кај Македонците, меѓутоа чекале со месеци да добијат абер што се случува со нивните и сега е можеби олеснителна околност е современата технологија. Меѓутоа тешко на тие родители што се децата не им се тука, изјави режисерот Мирко Видоески.
Глигорије Стојановски рече дека како актери имаат привилегија што играат пред една ваква публика.
– Верувам дека вечерва се изненадија пријатно од изведбата на претставата „Вај-фај“. Внесовме малку и наши лични приказни и мислам дека уште повеќе допревме до нивниот вкус. Се надевам дека и понатаму ќе продолжиме да работиме вакви претстави. Текстот и во иднина ќе биде актуелен.
– Посебно сум среќна и задоволна, затоа што публиката едноставно уживаше. Најмногу што е потребно на оваа тетовска публика е само смеењето. И задоволни да одат дома, истакна актерката Наташа Петровска.
Ова беше втора премиера на Драмско студио Тетово. Првата претстава монодрамата „Иконија, пардон матмазел Ика“ која беше изведена во март, ќе се постави и во Скопје, на први јуни во Драмски театар.
ас
