Девет пожарникари со две возила од Територијалната противпожарна единица-Тетово ќе заминат во Турција за да помагаат во справувањето со последиците од земјотресот во југоисточниот дел од земјата. Тие имаат опрема за пребарување и спасување на луѓе под урнатини.
-Општина Тетово и Територијалната противпожарна единица во знак на солидарност и поддршка со турскиот народ во овие тешки денови и кои имаат потреба од пронаоѓање и спасување на луѓето кои останаа под урнатините како последица од вчерашниот земјотрес испратија специјализирана и лиценцирани пожарникари за елементарни непогоди кон Турција. Во знак на солидарност и поддршка, група од 9 лиценцирани пожарникари за елементарни непогоди од Територијалната противпожарна единица Тетово, со противпожарна и опрема за пребарување и спасување заминаа за југоисточниот дел на Турција за да му помогнат на турскиот народ, велат од Општина Тетово.
И вчера градоначалникот на општина Тетово Билал Касами изрази солидарност со турскиот народ по разорниот земјотрес што погоди делови од Турција.
-Во овие тешки моменти стоиме во солидарност со турскиот народ по разорниот земјотрес што ги погоди неколку градови на југоистокот на Турција. Сочувство за изгубените животи, додека на повредените им посакуваме брзо закрепнување!“, напиша Касами.
Пожарникарите, предводени од командантот Авни Амети се обучени за ваква намена за пребарување и извлекување на луѓе во случај на земјотрес.
