Поетот и писател Перица Сарџоски го издаде своето најново литературно дело стихозбирката „Огнен пој“. Издавач е ПНВ Публикации. Ова е трето книжевно дело на Сарџоски, по поемата „Карпа жива“ од 2005, додека во 2006 година го има издадено патописниот роман „Цветниот пат“.
-„Огнен пој“ е збирка поезија во која се поместени повеќето од песните кои сум ги пишувал низ годините, со цел да ги соберам на едно место и да „остане запис за идните генерации“, изјави авторот Сарџоски.
Збирката содржи 33 песни поделени вотри циклуси кои го покажуваат процесот на зреење на поетската мисла.
-За стихозбирката Огнен пој: „Огнен пој“ е стихозбирка од македонски автор, чија структура ја претставува последната песна на фениксот (симболот на воскресението) која означува крај на еден животен циклус и почеток на нов, при што последната песна на фениксот е најубавата песна која маѓепсува, притоа алудирајќи на духовната и мистичната симболика со која авторот не води низ едно внатрешно патешествие со препознатлива универзалност, вели Елена Пренџова во рецензијата за стихозбирката.
Таа потенцира дека во првиот циклус, поетот ја започнува својата духовна преобразба повикувајќи го читателот до длабочините на неговата душа.
-Во вториот циклус, песните се кратки и повикуваат на внатрешно согледување на процесот на преобразба, каде што зборот навлегува во метафизичкиот свет на поетот и синтетизира. Во третиот циклус, поетот го прикажува процесот на будење, кога човекот се гледа себеси како дете на Мајката Земја, поврзувајќи ги древните мистерии на Големата Мајка Божица со земјата во која живее денес, која иако распната, во неговите очи воскреснува заедно со него, градејќи една длабока метафизичка врска помеѓу минатото и сегашноста, со поглед кон вечноста, во кои поетот се препознава како универзално битие – космичко чудо, се вели во рецензијата.
Според рецензентот во песните доминираат мотиви и теми поврзани со лични, внатрешни, духовни и мистични доживувања на поетот, често поврзани со темата Македонија, што ја симболизира поврзаноста на поетот со својата земја, тој како нејзин гласноговорник, сведок на нејзиното битисување и небитисување, но и заштитник, преку кого се трансформира и земјата со која се поистоветува.
Перица Сарџоски е роден во 1976 година во Тетово. Дипломирал на Филолошкиот факултет (англиски јазик и книжевност) при Универзитетот Св. Кирил и Методиј во Скопје, во 2001 година.
ас
