Полициски службеници на СВР Тетово вчера (28 мај) од 14 до 19 часот спровеле акциска контрола на мотоциклисти, чиј број деновиве е значително поголем на патиштата и улиците во Полог. При контролата бил санкциониран 31 мотоциклист (ТЕ-22 и ГВ-9).Најголемиот број од нив (19) некористеле заштитен шлем, односно кацига (ТЕ-14, ГВ-5), 9 мотоциклисти (ТЕ-6 и ГВ-2) ги управувале мотоциклите без возачка дозвола, 2 (ТЕ-1 и ГВ-1) имале истечена осигурителна полиса и 1(ТЕ) истечена регистрација.
На сите им се изготвени поднесоци и ќе се соочат со законски предвидените санкции, зависно од видот и карактерот на констатираните прекршоци, се движат од 45 евра за некористење кацига до 500 евра во денарска противвредност за нерегистриран мотоцикл подолго време, согласно Законот за безбедност на сообраќајот на патиштата и Законот за возила.
Секторот за внатрешни работи Тетово и во наредниот период ќе продолжи со вакви и слични активности и апелира до мотоциклистите навреме да ги регистрираат и да не ги управуваат без возачка дозвола, но и задолжително да користат заштитна опрема, а пред се кациги. Зашто, на тој начин ефикасно ќе се заштитат од евентуални несакани удари или паѓање од мотоциклите.
На мотоциклистите им се советува, исто така, максимално да ја прилагодат брзината со која се движат, посебно низ градските улици во Тетово и Гостивар и да внимаваат на бучавоста, на нивните мотоцикли, пред се во вечерните часови. За преголема бучавост и истечена регистрација повеќе од 6 месеци, покрај парични глоби, предвидено е и времено одземање на мотоциклите од три месеци.