На бесплатнатa онлајн енциклопедија Википедија на македонски јазик од денеска ќе има повеќе статии поврзани со Тетово, откако се одржа работилница на која се напишаа и објавија нови текстови.
Статии ќе има за библиотеката „Кочо Рацин, Здружението на Срби и Македонци, планинарски дом Љуботен и други луѓе, групи, установи или организации.
-Ова е активност на споделено знаење со цел ткн. Википедијанска екскурзија да биде во некој град, се посетува градот и се уредуваат тематски статии општо поврзани со градот Тетово. Овој проект го почнавме во 2020 година за прв пат во Велес, па потоа во Кратово, Кавадарци и Гевгелија. Треба да се пишува локална содржина, автохтона македонска содржина и да се шири мрежата на македонската Википедија и на македонските корисници, изјави Никола Милошевски координатор на заедницата за споделено знаење која се занимава со умножување на статиите на Википедија на македонски јазик.
Според него Википедија на македонски јазик е на 64-тото место или од 319 активни јазични википедии.
-Македонската Википедија моментално има над 130 илјади статии, што ако гледаме по глава на жител по однос на колку жители има Македонија или на колку луѓе мајчин јазик им е или дали го познаваат македонскиот јазик, на солидно ниво сме. Ако споредиме, Грција која има 10 милиони народ, има 200 илјади статии, значи има 70 илјади статии повеќе, ама многу повеќе народ. Не треба да запреме туку да создаваме уште статии, порача Милошевски.
Тој порача и дека секој која сака да создава статии тоа може да го направи и преку интернет, со контактирање на Здружението „Споделено знаење“, кое се занимава со умножување на статиите на Википедија на македонски јазик.
ас