Шеснаесетгодишниот ученик Велко Тодоровски го фати осветениот крст на Богојавление во црквата Свети Никола во село Челопек.
-Во црквата Св. Пресвета Богородица беше отслужена празнична литургија, а потоа поворката со Богојавленскиот крст се упати кон црквата Свети Никола. Попатно, во спомен на минатите времиња кога осветениот крст се фрлал на селската чешма „Тричешме“ поворката трипати се поклонува и се осветуваат водите од селската чешма од која во текот на целата година жителите ја користат за пиење, особено во летните денови. Спуштањето на крстот во црковниот базен на црквата Свети Никола го изврши парохискиот свештеник, протојереј отец Ненад Ѓорѓевски. Кон присутните гости традиционално се принесува домашна греана ракија и салата, информираа од црковниот одбор.
Велко е втора година во средното училиште „Јахја Кемал” . Со неговото друштво со Богојавленскиот крст ја посетува секоја куќа во селото и со песната „Во Јордание“ го навестува доаѓањето на Светиот крст во секој дом.