Општината да најде начин да нема кучиња по улиците, се најчестите реакции на жителите на Тетово откако вчера локалната самоуправа објави правилник со кој предвидува во иднина да прави спогодби со луѓето кои се нападнати и повредени од бездомни кучиња.
Ана Марија Блажевска е меѓу граѓаните кои во 2022 година била повредена од бездомно куче па ја тужи општината, но вели дека најбитно е да се најде постојано решение за овој проблем, отколку да начи да се обештетат повредените.
-Јас сум голем љубител на кучиња, но после оваа случка која се случи, можам да кажам дека чувствувам траума, затоа што денеска кога и да поминам покрај бездомни кучиња имам така некоја нелагодноста, затоа што не е мала повредата која ми се случи. Не се криви кучињата, но локалната власт се најголеми кривци за оваа состојба, кога би имале стационари кога би биле згрижени сите тие кучиња не би имале вакви проблеми. Сметам дека општината треба да поработи на тоа да го реши, зошто би се тужеле и би се носеле правилници за исплата на тие средства кога би требало да се овој проблем реши од корен, изјави Ана Марија Блажевска.
Таа го има добиено спорот во Основен суд па сега чека Апелационен суд да се изјасни по жалбата на општината. Настанот се случил пред речиси една година на 1 февруари 2022.Од тогаш таа со себе со носи апартче со фреквенција која ги плаши кучињата.
Од Општина Тетово велат дека Правилникот за спогодбено обештетување на граѓаните е во полза на населението.
-Со ова, Општина Тетово им излегува во пресрет на граѓаните, со тоа што процедурите за вакви случаи се поедноставуваат, воедно и се намалуваат, односно избегнуваат судските трошоци, како и трошоците за извршители, адвокати и така натаму, изјави Милена Вучевска, портпарол на Општина Тетово.
Правилникот во кој е објаснета целата процедура е објавен на веб страната на општината, заедно со барањето кое оштетеното лице треба да го пополни и достави преку архивата до Комисијата за постапување по барања за надоместок на штета составена од стручни лица, како лекари трауматолози и лекари од областа на психијатријата.
Секој граѓанин кој ќе биде повреден од бездомно куче ќе добие предлог за спогодба и можност за надоместок од 30 до 100 илјади денари во зависност од тоа колку ќе определи соодветната Комисија за постапување по барање за надоместок на штета предизвикана од каснување од бездомни кучиња на подрачје на општината.
ас
