Големиот број пријави на жителите на Тетово дека биле каснати од бездомни кучиња ја доловуваат состојбата во градот со која се соочуваат граѓаните и алармираат за посеопфатно решение од страна на локалната самоуправа. Статистиката на Службата за социјална медицина и статистика при Центар за јавно здравје ја прикажува состојбата, односно тоа дека во изминатите три месеци од 2021 година има огромен број на нападнати и каснати од кучиња скитници, ако се спореди со целата 2020 година.
Само во првите три месеци од 2021 година биле каснати вкупно 29 лица односно побарале и добиле вакцина против беснило во Инфективно одделение при Клиничка болница во Тетово. Во текот на целата 2020 вакцина против беснило затоа што биле искасани од бездомни кучиња имало дадено вакцина против беснило за вкупно 36 лица.
-Од 29 лица кои добиле вакцина во месеците јануари, февруари и март 2021 година, 11 се машки и 18 женски лица. Најмлади се две девојчиња на седум години, а најстаро едно машко лице во категорија на граѓани над 65 години. Од 36 лица кои добиле вакцина против беснило во текот на целата 2020 година 25 се машки, а 11 женски лица, информираат од Службата за социјална медицина и статистика при Центар за јавно здравје.
Дел од луѓето кои се искасани од бездомни кучиња случаите ги пријавуваат и во тетовската полиција.
-Годинава, заклучно со 21 април во СВР Тетово пријавени се 38 каснувања од бездомни кучиња, кои се случиле на подрачјето на Полициската станица Тетово и уште три на подрачјата на другите полициски одделенија. Минатата, 2020 година,пак, вкупниот број на пријавени напади и каснувања од кучиња изнесувал 50, за цела година, информира Марјан Јосифоски, портпарол на СВР Тетово.
Општина Тетово третманот на кучиња скитници го прави преку избор на ветеринарни ординации кои добиваат определени средства за таа намена. Според договорот објавен на електронскиот систем за јавни набавки најновиот склучен договор е на 25 февруари. Ветеринарната ординација добила три милиони денари за третман на бездомните кучиња и ќе постапува се додека има средства за тоа.
А.С