Комисијата за заразни болести се уште проценува дали треба да укине забраната за јавниот превоз во тетовскиот регион, истакна главниот координатор на кризните штабови на општините и заменик премиер Бујар Османи денес од Теарце. Според него позитивна одлука е можна за неколку дена, а во таков случај го потенцира дека луѓето мора да имаат лична заштита.
-Имаше барање од локалниот кризен штаб во Тетово за отворање на јавниот транспорт. Тоа барање го пренесов јас како координатор до главниот кризен штаб. Комисијата за заразни болести констатираше дека требаат уште неколку дена за да го види трендот на бројките во Тетово па после да ја донесе одлуката. Ќе чекаме уште некој ден и ќе видиме кој е трендот и верувам дека комисијата ќе донесе мерка за олеснување на на превозот, рече Османи.
И во случај на овозможување на јавниот превоз, Османи го потенцираше значењето од придржувањето на мерките за лична заштита.
-Нема посилна мерка од личната свест не сметам дека ни еден политичар треба да се спротистави на одлуките на комисијата за заразни болести, тие се експерти тие знаат најдобро да се спречи болеста но се разбира ќе се обидам да аргументирам дека во оваа втора фаза личната работа со луѓето и психолошката поддршка и охрабрувањето и борбата со лажни вести, давањето на точни информации на луѓето е многу посилна од колку било кој казни. Не може нити еден полицаец да влезе во домовите и да проверува колку луѓе се собираат и дали ставате маски и слично, рече Османи.
Тој потсети дека мерките се неопходни за сите, бидејќи не е точно дека само стари луѓе умираат, туку дека тоа се случува и со деца и со млади.
А.С