Велигденска порака на митрополитот г. Јосиф до верниот народ на тетовско-гостиварската епархија
Драги браќа и сестри,сакани духовни чеда на Тетовско-гостиварската епархија на Македонската православна црква. Оваа вечер имам можност да влезам во Вашите домови на малку поинаков начин од вообичаениот. Доколку ми дозволите би сакал да Ви ги пренесам моите пораки.
Во овие празнични мигови на воскресенското очекување, дозволете од лично мое име како надлежен епархиски архиереј и од името на чесното свештенство при Тетовско-гостиварската православна епархија да Ви го честитам празникот над празниците: Христовото воскресение – Велигден, со благопожелби за добро здравје, духовен спокој, како и со желби за конечна победа над смртоносниот вирусот, кој предизвика овој најрадосен ден да го дочекаме во едни поинакви услови.
Наоѓајќи се на самиот праг на Христовото воскресение да не дозволиме световната паника и стравот да ни ја намалат воскресенската радост. Имајќи ги на ум зборовите на ангелот: „Не бојте се! Вие го барате Исуса Назареецот, Распнатиот. Тој воскресна!“, во овие вонредни околности повторно од длабочината на нашите срца да Го посведочиме Христовото воскресение, да ја посведочиме пред целиот свет победата на Животот над смртта, победата на вечното над минливото и победата на духовното врз материјалното, постанувајќи сведоци на вечната победа на смислата над бесмислата.
Празнувајќи, овој Велигден нашите молитви нека бидат посветени за телесно и духовно здравје на нашите болни браќа и сестри, како и за сите оние кои и во овие торжествени моменти се грижат за зачувување на општествениот поредок и за здравјето на нашите граѓани. И нив и сите Вас, Воскреснатиот Христос Бог, Победникот над смртта да Ве благослови и обдари со светлината на Неговото тридневно воскресение, влевајќи благодат на воскресенска надеж во Вашите души.
Како Ваш постојан молитвеник пред Христа Воскреснатиот, се молам за здравје, мир и радост во Вашите семејства. Почитувајте ја важноста и светоста на семејството и бидете секогаш заедно. Враќајќи се кон исконските вредности, да овозможиме светла иднина.
Нека е честит најголемиот христијански празник, радоста над сите радости Христовото воскресение – Велигден.
ХРИСТОС ВОСРЕСНА !
НАВИСТИНА ВОСКРЕСНА!