„Трио Кладенец“ при КУД „Кирил Пејчиновиќ“- Теарце е добитник на прво место Гран при награда за целосно најдобар настап на 47 издание на Фестивалот на народни инструменти и песни „Пеце Атанасовски“ што викендов се одржа во Прилеп.
Според жирито во состав етномузиколози д-р Родна Величковска и м-р Стојанче Костов од Институтот за фолклор „Марко Цепенков“ од Скопје и д-р Горанчо Ангелов од музичката академија при универзитетот „Гоце Делчев“ од Штип машкото вокално трио од КУД „Кирил Пејчиновиќ“- Теарце го прогласија за најдобар настап за посебно претставување на гласоечкото пеење од Долно Полошкиот регион кое е заштитено од УНЕСКО како нематеријално културно наследство.
-Особено сме горди што во конкуренција од 320 изведувачи на изворниот мелос жирито одлучи да ни додели Гран при за целосно најдобар настап. Освоената награда ќе ни претставува мотив за уште поголеми успеси во иднина. Особено ни претставува задоволство што наградата ни е доделена од врвни професионалци во областа на фолклорот кои со години ја всадуваат љубовта за фолклорот на многу млади генерации, изјави Сашо Костадиновски уметнички раководител и етнокореолог при КУД „Кирил Пејчиновиќ“- Теарце.
Најголема заслуга за освоената награда ја носат уметничкиот раководител и етнокореологот Сашо Костадиновски, кореографите Мирослав Симјановски, Бобан Трпковски и најмладиот член на триото Иван Божиновски.
47 -мото издание на реномираниот Фестивалот за народни инструменти и песни „Пеце Атанасовски“ се одржа на 2 и 3 јули во Прилеп и на Рудина, Долнени.