Родителите на учениците од ОУ „Гоце Делчев“ алармираат дека повеќе по еден месец од нивниот јавен протест се уште не е решен комуналниот неред пред школскиот двор каде се поставени контејнери за оставање на смет. Контејнерите се речиси постојано полни, а смет има околу нив поради што се собирата бездомни кучиња.
-Иако ни беше ветено на средба со градоначалникот Биљал Касами дека контејнерите ќе се тргнат од пред школото, тоа не е направено. И понатаму контејнерите се преполни со смет, често пати отпад има околу нив, па се собираат кучиња скитници. Така и понатаму децата се во опасност да бидат нападнати од бездомните кучиња, а потенцијална опасност од зарази е и самиот расфрлан смет, изјави Дарко Петровски, член на родителската група која реагираше во февруари.
Од друга страна Општина Тетово денес најави дека во понеделник по повод Денот на пролетта 21-ви март ќе се организира голема еко акција за чистење во градот. Општина Тетово апелира на масовна вклученост на граѓаните во акцијата.
-Планирано е акцијата да опфати повеќе локации (критични точки, основни и средни училишта, диви депонии. Ги повикуваме сите заинтересирани поединци, здруженија, организации (нво), компании, политички партии, да се приклучат на акцијата. исто така, се повикуваат сите кои можат да помогнат со механичка или друга опрема, со цел акцијата да биде навистина ефективна и успешна, се вели во повикот.
Од општината повикуваат и стопанствениците да се вклучат во акцијата со расчистување на просторот пред нивните објекти.
-По тој повод, се известуваат сите трговци, сопственици на локали, продавници, ресторани, кафе барови, да се вклучат со свој придонес во акцијата преку чистење на просторот пред нивните локали. Дејствувајќи сите заедно, можеме да успееме да го направиме Тетово почист град, каков што сите посакуваме да биде. Заинтересираните, за подетални информации можат слободно да ни пишат на следниот е-маил : proffice@tetova.gov.mk. Сите заедно, за почисто Тетово, какво што го сакаме, се вели во денешното соопштение на Општина Тетово.
По преземањето на власта новиот градоначалник најави еко акција за чистење во ноември. Таа беше одложена поради трагедијата во Бугарија при што загинаа 45 луѓе меѓу кои и жители на Тетово.
