Во рамки на одбележувањето на Денот на македонската полиција 7 мај денес делегации на Секторот за внатрешни работи Тетово ги посетија вечните почивалишта на неколкумина трагично загинати полициски службеници од тетовскиот регион. Во кругот на полициската станица за безбедноста на патниот сообраќај беше положено цвеќе пред спомен бистата на Цоки Стојановски, полицаец загинат во 2001 година.
-Би сакал да им го честитам празникот Седми мај, Денот на македонската полиција. Денес сме собрани тука да дадеме почит и чест кон загинатите колеги, дел од нив припаѓаа на оваа полициска станица. Се надевам дека во иднина нема да остане во заборав. Ние континуирано ќе оддавме почит како на Цоки така и на сите останати колеги, истакна Зоранчо Талев, командир на полициската станица за безбедноста на патниот сообраќај.
Со полагање букети цвеќе на нивните гробни места почит им беше оддадена на Сашо Самојловски и Жарко Кузмановски двајцата припадници на специјалните единици на македонската полиција од Тетовско кои загинаа на 9-ти мај 2015 година во антитерористичката акција во кумановската населба „Диво насеље“. Колегите му оддадоа почит и на Дано Петрески службеник, крим-техничар кој го загубил животот во полициска акција во Палчиште во 1997 година, како и на на полицаецот Живко Јовановски кој почина во 2014 година во несреќен случај.
Цоки Стојановски загина извршувајќи службена должност во август 2001 година. Загина на 28 години, а остави зад себе сопруга и две малолетни деца.
А.С