Тетовчанецот Драган Стојчевски на 41 година стана балкански првак во бодибилдинг и фитнес во категоријата на мажи „Мастер Физик“ од 40 до 49 години на шампионатот што се одржа во Романија овој викенд. За да се победи со своето тело на ваков натпревар Драган објаснува дека се потребни повеќе месечни подготовки.
-На натпреварот судиите го оценуваат атлетското тело на натпреварувачот кој настапува. Се оценува едноставно целината на телото на бодибилдерот при што се согледува дефиниција и симетрија на тело. Освен тоа потребно е да има и добар изглед на кожата. За се тоа потребни се повеќе месечни подготовки и внимањето на исхраната и практикување на редовни тренинзи, вели Стојчевски.
Тој се подготувал од септември 2019 година, со тоа што првично ова балканство првенство требало да се одржи годинава во мај.
-Од лани интензивно се спремав се до февруари-март. Како секаде и за ова натпреварување се се одложи поради пандемијата. Потоа се одложуваше се до овој викенд од 4 до 6 септември. Голем предизвик беше да се одржи кондицијата односно да се одржи топењето на мастите и да остане мускулатурата. За таа цел и ослабев, а постојано бев во исчекување. Голема потешкотија за мене беше периодот во јули кога почина мојот татко, моја голема поддршка за ова натпреварување и воопшто во животот, вели Драган, кој победата ја посветува токму на својот родител.
Во периодот јули-август сепак успеал да продолжи да се подготвува.
-Јас се подготвував цело време со тоа што главна насока беше топењето на мастите во организамот. Тоа подразбираше вежбање бодибидлинг во теретана секојден со од понеделник до сабота секоја мускулан група по еднаш и после тренинг во теретана уште 45 минути сум трчал. Влегов во еден тежок и напорен процес да се стопат мастите и да остане месо на мене. Целта е баланс на вежбањето и внимање на исхрана. Мастите мора да се извадат да остане квалитет мускулатура, објаснува Драган Стојчевски.
На балканското првенство во градот Дробета-Турну Северин во Романија учествувааа 126 натпреварувачи од 9 земји. Сега предивик за Драган ќе биде Европското првенство во Шпанија (15-21септември) но тоа зависи од состојбата од корона пандемијата и можноста да се патува таму.
Драган со спортот започнува од детството кога почнал да тренира атлетика, спорт со кој се занимавал изминатите децении. Во 2004 бил ја добил титулата Мистер на Македонија, а во 2006 и Мистер на Европа.
А.С
