Здружението „Еко Герила“ побара да се испита како се изградил новиот водоснабдителен систем за Тетово поради честите дефекти и прекини во снабдувањето. Според нив независна комисија треба да утврди дали системот е направен согласно сите стандарди.
-Честите дефекти во новоизградената мрежа во Лешница оставаат сериозни сомневања за квалитетот на градбата, при што многу граѓани ја имаат изгубено довербата во сериозноста на работите кои ги реализира или нарачува Општина Тетово. Истражна комисија од независни експерти треба да го испита нивото на изградбата на оваа мрежа и дали таа ги исполнува потребните стандарди и параметри за нормално функционирање и редовно снабдување со вода за пиење на градот Тетово, се вели во соопштението од Еко Герила.
Од организацијата посетуваат дека директорката на Инспекторатот за животна средина Ана Петровска, неодамна предупреди дека со изградбата на хидроцентралата на Шар Планина во Лешница, водата за пиење може да биде загадена и граѓаните на Тетово да бидат загрозени да останат и без вода.
-Изградбата е на само 300 метри близу до каптажата. Затоа, контролата на целата документација за градежни дозволи издадени од Општина Тетово за овие хидроцентрали мора да помине од експертска анализа. Последиците од овие градби од хидро-мафијата го загрозуваат Тетово и околината за правото на вода за пиење. Трпението на граѓаните е при крај. Некој треба да преземе одговорност за ова, велат од Еко Герила.
Новиот водоснабдителен систем за Тетово беше пуштен во употреба на 17 септември 2017 година. Предвидено е да обезбедува вода за пиење од планинските реки, со што во системо се можни дополнителни максимални 250 литри вода во секунда. Новиот систем како долгорочно решение за недостигот на вода за пиење почна да се гради од 2000 година и имаше чести прекини во изградбата.
А.С