Евиденцијата на одделението за аналитика при СВР Тетово бележи дека за шест месеци во 2021 година изречени се вкупно 1874 казни за погрешно и непрописно паркирање во градот.
Најголемиот број од поднесоците биле за паркирање во таканаречени „двојни редови“, во зона на крстосници или на други недозволени места, и тоа во јануари (568) и февруари (604).
-Засилени контролни активности за поголем ред и безбедност со паркирањето, посебно во централното подрачје на Тетово секојдневно ќе се реализираат и во наредниот период. Нивна цел е да се спречат поголеми сообраќајни мешаници, дотолку повеќе што веќе започнаа да пристигнуваат времено вработените нашинци во странство, со што значително ќе интензивира сообраќајната фреквенција во градот и пошироко во регионот. Летово, исто така, ќе следат и активности за справување со самоволните узурпации на јавните сообраќајни површини за трговски, угостителски или други цели, кои адекватно ќе се санкционираат, а за да се овозможи непречено движење на пешаците по тротоарите, вели Марјан Јосифоски, портпарол на СВР Тетово.
Кај вкупниот број казнети возачи во полугодишниот период, со помош на тетовската „пајак-служба“ вкупно подигнати се 804 возила, поради тоа што во голема мерка го попречувале нормалното и безбедно движење на другите учесници во сообраќајот, возила, пешаци и слично.
А.С
