Во уметничката галерија во Тетово вечерва во 20 часот свечено ќе се отвори изложбата на монотипии од авторот Илиана Петрушевска од Скопје. Ќе бидат изложени 50 дела на авторката се до петок 13 септември.
-Станува збор за монотипии, техника на графика со рачно изработена хартија, печатени во боја. Посебен ефект во изведбата е добиен преку пластичните структури и летристичките интервенции (цитати и издвојување на букви), што всушност се колажни решенија, кои не се само формални елементи, туку алудираат како инсерти на она што таа сака да го поттикне – повеќеслојноста на идејниот концепт, велат од Уметничка Галерија Тетово.
Илиана Петрушевска е родена 1973 година, дипломирала на факултетот за ликовни уметноста во Скопје. Работи како графички дизајнер. Досега имала 4 самостојни изложби и учество на десетици групни изложби и ликовни колонии.
