Во Центарот за култура „Иљо Антески-Смок“ во Тетово вчера вечер се одржа премиерата на на траги-комедијата „Бубрегот“ на македонски јазик по текст на австрискиот автор Штефан Фогел, а во режија на Марјан Георгиевски од Битолскиот театар. Беше изведена камерна претстава на која публиката непосредно до сцената ги почувствува сите емоции од текстот кои актерите успешно ги одиграа.
-Кога има камерна претстава актерите играат на блиску до публиката и имаат едно нешто да бидат вистинити, да не лажираат, да се случува чинот вистина сега и тука. Тој контакт што се случува на сцена публиката го гледа на едно метро од нив и затоа е навистина голема возбудата да се прави претстава од тој тип. Ваквите приказни за два пара се случува во нашите животи, кои од една забава на крајот доживуваат и еден голем кошмар, изјави режисерот Марјан Георгиевски.
Тој како гостин од Битолски театар рече дека е презадоволен од процесот на соработка со овдешните актери и Тетовски театар и покрај тоа установата функционира под капа на Центар за култура.
-Некако најдовме начин да се координираме. Презадоволни сме од целиот процес, работевме на најразлични принципи од психо-драма, најразлични анализи, имавме супер поткрепа. Имаше одлични реакции од публиката и баш беше тоа што го очекувавме и повеќе од тоа и на претставата и посакувам континуитет и покрај што нема Тетовскиот театар репертоар. Ги поканувам сите тетовчани да го посетуваат Тетовскиот театар да дадат на некој начин поддршка да се вклучат во културниот живот на секој начин. Без публика претставата не би значела ништо. Ни тука работиме за средбата со публиката. Кога ќе се случи средбата се случува магијата и навистина оваа претставата би ја дефинирал како психолошка драма, испреплетена со црн хумор, некаков магичен реализам за кој што актерите морам да ги пофалам дека дадоа се од себе, рече Георгиевски.
Играа четворица актери, двајца вработени актери Тетовски театар, Ѓорѓи Нешковски и Ирена Мирчевска, како и двајца гости, Марко Богдановски и Јасминка Василева. Сценографија ја изработи Валентин Светозарев. Ова беше прва режија на Марјан Георгиевски надвор од Битолски театар.
ас