Меморијалниот марш во спомен загинатите во сообраќајна несреќа кај Ласкарци започна изутринава околу 6 .30 часот, а учесниците кои пеш тргнаа од селото кон Гостивар околу пладне одморија на отрилика половина од патот кај тетовската патарина. Таму ги пречека гостиварскиот градоначалник Арбен Таравари. Најави дека во знак на благодарност до жителите на Ласкарци се прави обид неговата општина да им помогне во изградба на улица.
-Иницијативаа со месната заедница ја договоривме како благодарност до селото за нивната помош која ја укажаа кога се случи несреќата. Одлуката беше заедничка, да се изгради уличка со бекатон. Бидејќи нема жиро сметка на име на селото и месната заедница, предвидените 5000 евра се уште се на буџет на општина Гостивар. Се надеваме да најдеме невладина организација од Ласкарци за да се префрлат средствата и да се релаизира идејата, рече Таравари.
Исто така во иднина ќе се прави обид секоја година овој марш да биде традиционален и да им се оддаде спомен на загинатите.
-Кога групата добронамерни граѓани ја предложи идејата за меморијален марш со срце и душа реков ќе го поддржиме. Јас не можев да пешачам, но ми се допаѓа идејата да ја одржиме како традиција, рече Таравари.
Во групата од 60-тина луѓе кои стигнаа до Тетово имаше членови на семејствата на загинатите и повредените, рекреативци и спортисти.
-Целта е да се поддигне свеста кај граѓаните, да бидеме попретпазливи во иднина додека возат, а до надлежните праќаме порака да преземаат мерки за побезбеден сообраќај, изјави Замир Мустафаи, учесник во маршот.
. Пред една година 16 патници загинаа, десетици беа повредени во сообраќајната несреќа кај Ласкарци по превртување на автобус кој се движеше од Скопје кон Гостивар.
А. С
