Пациентите прв пат имаат можност за рехабилитација во дворот на Специјализираната болница за белодробни заболувања и ТБЦ во Лешок со долга патека поставена на повеќе нивоа по која може да одат на кратка прошетка, на чист воздух и да се одморат на изградените и уредени одморалишта. Со одобрени средства од Министерството за здравство и Фондот за здравствено осигурување купено е земјиштето под објектот на болницата. На овој начин не само што е зголемена дворната површина, туку во завршна фаза е реализацијата на проектот за санирање на свлечиштето и изградба на пешачка патека околу болницата. Ова беше нужна измена за подобри услови за пациентите и здравствениот персонал, информираат од Министерството за здравство.
Извршено е и пошумување со над илјада зимзелени дрвја, обезбедени со сопствени средства и со донација, а извршено е и реновирање со нова фасада.
-Во изминатиот период, завршено е инсталирањето сопствен агрегат за струја, што е од огромно значење за установата. Реализиран е проектот изградба на лифт, со кој е решен проблемот за транспорт на пациенти, а проширен е и паркинг просторот пред болницата со што е овозможена полесна пристапност на пациентите, велат од ресорното Министерство.
За 2 години се реализирани четири вработувања, а здравствените работници во две фази имаат зголемени плати и подобрени услови за работа за овозможување квалитетна здравствена нега.
За активностите кои се спроведени во изминатиот период во болницата во Лешок вчера се информираше министерот за здравство, доц. д-р Венко Филипче, при неговата посета и средба со директорот д-р Исмаил Ваити и вработените во оваа здравствена установа.
