Памела Маџовска е победничка на 30-то јубилејно издание на манифестацијата „Вешта жена“ за Тетово. Таа подготви главно јадење, торта и аранжман на маса на насловени „Морско дно“.
Во текот на изборот кој вчера вечер се одржа во Тетово нејзината маса беше претставена под број 1. Освои прво место по гласови од публиката како и прва позиција според гласањето на жирито кое ги оценуваше сите пет маси на учесничките на изборот за највешта жена.
-Оваа година сум добитничка на првата награда на Вешта жена, мојата тема беше „Морско дно“ со главно јадење морски плодови со печурки. Имам голема љубов кон готвењето, сакам да готвам по дома и баш ми е мило што победив и сакам да порачам младите да готват, изјави победничката 20 годишната Памела Маџовска.
Организацијата „Вешта жена“ со овој избор на највешта жена од Тетово одбележа и 30 години од постоењето. Мотото на јубилејното издание на Вешта жена беше „Со здрава исхрана и чист воздух до здрав живот – Тетово сака парк“.На овој начин се даде и поддршка на на истоимената иницијатива „Тетово сака парк“.
-Јубилејното издание беше повод да доделиме благодарници на многу жени кои се дел од манифестацијата овие три децении. Се доделија благодарцници за 30 години активно учество како и за жените со 20, 15 и десет години искуство во натпреварувачкиот дел како и во организацијата и развојот на манифестацијата „Вешта жена“. За особен придонес во образованието признание доделивме на Соња Трифуновска, а во медицината д-р Зорица Билбиловска, изјави Снежана Стојановска, претседателка на Здружението Вешта жена.
Сите победнички на манифестацијата Вешта жена по градови ќе се соочат на републичко финале кое се планира за 14 и 15 октомври во Лешочкиот манастирски комплекс.
Победничката се избира со тоа што жирито дава поени во 8 категории, како што се главно јадење, сервирање и аранжирање на маса, вкус, ескпонат и друго. Во изборот на победничка се вбројуваат и гласовите на публиката.
ас