Граѓаните кои поседуваат накит што се користел со народните носии може да го изложат во рамки на изложбата која ја подготвува Музејот на тетовски крај за крајот на годината. Од Музејот ги повикуваат граѓаните да придонесат со презентирање на накитот со оглед дека во оваа установа постои само мал број на предмети од таков етнолошки материјал.
– Музејот располага со збирка на накит но меѓутоа нецелосен и недоволен. Затоа ги повикувам граѓаните од Тетовско оние кои имаат накит а кои сакаат да го оттуѓат или накит кој сакаат да го презентираат со враќање назад после изложбата можат да дојдат во музејот да го депонираат и истиот накит ќе биде евидентиран ќе биде обработен и после перформаност ќе биде вратен. Ги повикувам граѓаните од сите етнички заедници од сите националности да го донесат во Музејот и со тоа да ја збогатат изложбата. Оние кои сакаат да го оттуѓат трајно може да добијат и финансиска надокнада, изјави Валентина Гавриловска, кустос-етнолог во Музејот на тетовски крај.
Накитот што се носел со народната носија е од монистра, златен или сребрен накит. Луѓето и сега го носат како семејно наследство, а претставува и етнолошко богатство, потенцира Гавриловска.
-Накитот претставува етнографски белег и идентификациски код на посебност и автентичност. Накитот е како симбол и израз на статус и економска моќ. Накитот како средство за покажување на елеганција, моќ и економски статус отсекогаш се носел и истиот ја зборува приказна за семејната, традиција, националната традиција и економската моќ на семејствата во Тетовско, вели кустосот Валентина Гавриловска.
Предвидено е изложбата да се одржи кон крајот на ноември или декември.