Зоран Грковски новиот претседател Регионален одбор на Синдикатот за образование, наука и култура СОНК-Тетово ја образложува потребата за зголемување на платите на вработените во образованието.
-Регионалниот одбор на СОНК – Тетово го поддржува покачувањето на минималната плата на 18.000 денари и ја истакнува неопходноста за усогласување на платите на вработените во детските градинки и образовни институции со минималната плата на национално ниво. Со покачување на минималната плата без скалесто покачување на останатите плати, се врши изедначување или приближување во месечните примања на различни работни места. Доколку не се отпочнат неделава преговори со МОН за брзо надминување на ваквата ситуација, многу е веројатно дека ќе има генерален штрајк во целиот јавен сектор, што секако не е добро за државата. Затоа, СОНК се залага за спречување на хаосот во врска со неусогласеноста на минималната плата со колективните договори и завршување на овој процес во најкоро време, изјави Зоран Грковски
Според него Регионалниот одбор на СОНК – Тетово континуирано се залага за подобрување на правата на работниците и на своите членови, за подигнување на нивниот социјален и економски статус, како и за враќање на нивното достоинството во дејностите образование, наука и култура, секако отпочнувајќи на ниво на работодавач – установа, на ниво на локална самоуправа – општина и на централно ниво.
-Следува период на постојано решавање на проблемите во врска со трансформација на работните места на локално ниво, додаток за трошоци за превоз до и од работното место, каде што голем број на вработени од нашите дејности издвојуваат и до 1/4 од својата скромна плата, решавање на проблеми со административите службеници и помошно технички лица во културните институции, враќање на стекнатото право за регрес на годишен одмор, подобрување на работни услови согласно Законот за безбедност и здравје при работа, кариерен развој и други проблеми што ги имаат вработените во дејностите што ги застапува СОНК, изјави Грковски.
,
