Со одржување на свеченоста “75 години слободно Тетово“ вечерва беше одбележан датумот 19 ноември 1944 година кога Тетово е ослободено од фашистичките окупатори во Втората светска војна. За прв пат по повеќе децении се одржа ваква свеченост во Центарот за култура „Иљо Антески-Смок во Тетово“.
Историски час за ослободувањето одржа Јоцко Димитриевски, претседател на општинската организација на Сојузот на борци од Тетово.
-Тетово е последен ослободен град и со тоа е означено ослободувањето и на Македонија во 1944 година од тројната окупација на Италија, Бугарија и Албанија. Последните борби и операции се водеа околу Тетово. Во ослободување на Тетово активно учествувале 15 –тиот партизански корпус со 41 и 48 дивизија со вкупно 8 бригади борци но и граѓани кои се жртвуваат за нашиот град, рече Димитриевски.
Тетово дава три партизански одреди и двајца народн хероид Тодор Циповски Мерџан и Ѓоце Стојчески Амбарче, посочи говорникот.
-Тие ги дадоа животите 10 дена по капитулација на Бугарија и два месеци пред ослободувањето. Вечно ќе се сеќавањеме на нивната жртва, истакна Димитриевски.
Дел од свеченоста беа и исторски часови за партизаните кои ги изгубиле животите за слобода на Тетово, како и културно уметничката програма, драмско-уметнички перформанс, а во фоајето на Центарот беше поставена изложба на портрети на борците од Народнослободителната борба НОБ – уметнички дела на академскиот сликар Павле Кузмановски.
Дел од одбележувањето ќе има и утре пред Споменикот на револуцијата во Тетово каде ќе биде одржана свечена церемонија со полагање свежо цвеќе.