Општина Тетово и понатаму останува со најмногу 19 од 37-те случаи на лица заболени од коронавирус во регионот, објави денес Кризниот штаб на општина Тетово. Во Боговиње има 7, Брвеница и Теарце со по 5, а во општина Желино има едно лице заболено со КОВИД-19. И понатаму општина Јегуновце нема заболени.
-Кризниот штаб формиран во рамките на општина Тетово уште еднаш ја повикува Народната банка да упати инструкции до сите банки во Општина Тетово за да истите го прилагодат работното време на оваа вонредна состојба и да најдат модел на работа за исплата на пензиите, така што возрасните лица нема да се собираат пред влезовите на банките .Со процесот на дезинфекција и дератизација во градот Тетово континуирано да продолжи, истакна градоначалничката Теута Арифи.
Општина Тетово уште еднаш ќе отвори повик до сите маркети кои имаат целосна документација за својата работа и имаат повеќе од двајца вработени до среда во 12 часот за да можат да носат намирници за време на полицискиот час.
-Јавниот повик ќе се повтори за да може сите граѓани навремено да бидат опслужени не само во град Тетово туку и по селата од општина Тетово, рече Арифи.
Таа потенцираше граѓаните да ги следат официјалните информации околу коронавирусот.
-Ова се моменти кога треба да бидеме истрајни во почитување на мерките кои ги носат одговорните Владата и Министерството за здравство, да не подлегнуваме на лажните информации туку да се раководиме по официјалните податоци,рече Арифи.
А.С
