Општина Тетово нема повеќе пари за зголемување на можноста околу справувањето со бездомните кучиња, кои засега се третираат од ветеринарна ординација која три пати досега има добиено тендер. За посеопфатно и системско работење преку соодветна служба или институција градоначалничката Теута Арифи не размислува да направи како општина туку во склоп на полошкиот плански регион. Тетовчани веќе долг период се соочуваат со напади на бездомни кучиња, а се појавија и примери на труење на овие животни од страна на граѓани.
-Ние го функционализиравме и го реактивиравме процесот на тендерирање за да институцијата која го води тоа да биде сигурна дека ќе има исплата и можност за работа. Нормално е дека капацитетот на тој центар за градот Тетово е доволен но ако има други тенденции за интервенции и во другите помали општини, нормално така тие капацитети ќе бидат лимитирани. Ние сме заинтересирани да го зголемиме како капацитет но во текот на оваа година нема да сме во финансиска можност да го зголемиме. Но заедно со другите општини кои во целиот полошки плански регион, го имаме сите истиот проблем, сме се договориле да регионално ако може да пристапиме за да добиеме некоја меѓународна донација за поголем регеионален центар за третирање на кучиња скитници затоа што тоа е проблем на целиот регион и како таков сакаме да го адресираме, изјави Теута Арифи.
Од мај 2019 година досега има објавено три тендери со цел за згрижување и третирање на кучињата скитници во општината. По добивање на последниот трет тендер по ред, ветеринарната ординација која ги спроведува активностите, сега втора недела работи на терен.
-Првите два тендери беа по 600 илјади денари, а сега третиот е на 1 милион денари. Ова е долгорочен процес, но сега има и повеќе средства па ќе има и повеќе резултати, изјави изјави Рами Селмани, ветеринар од ветеринарната ординација која го има тендерот за постапување со бездомни кучиња.
Тетовската полиција вчера во 11 часот бележи најнова пријава за напад од бездомно куче. Жителка на Брвеница на 41 година пријавила дека вчера била касната од куче скитник во Брвеница, најблиското село на јужната страна од Тетово.
А.С
