Складирани стотици кубни метри дрва, исечени стебла, уништени шумски предели за да се пробијат диви патишта. Фотографии со ваква содржина се објавија од страна на планинари на социјалните мрежи, како реакција на изјавите на политичарите дека има потреба да се прогласи Шар Планина за национален парк. Планинарите алармираат и реагираат дека ако треба да се спаси природата тоа треба што поскоро да се направи и да се спречат ваквите слики.
-Пред неполн месец го искачив Доброшки врв,немаше ниту една камара со дрва. За тоа време исечено е како што може да се види од сликите (секоја слика е засебна и не е дуплирана) направено е пустош, велат планинарите.
-Поминува тешката механизација, се сечат сите дрва, се уништува монструозно се тоа што требало да биде заштитено подрачје, за да се произведе 1kW и да може комотно да поминат 500 овци, вели планинарот Јовица Рафајловски кој снимил уништен предел кон врвот Бориславец.
Во саботата министери, градоначалници и амбсадори прошетаа низ Шар Планина во рамки на кампањата за потребата да се прогласи национален парк.
-Работите привршуваат и во наредните месеци очекуваме прогласувањето да се реализира. Таа динамика коинцидира со процесот на започнување на преговори со што даваме две пораки дека политички созреавме да станеме дел од Унијата и се доближуваме на европските стандарди за заштитено подрачје, изјави во саботата вицепремиерот Бујар Османи.
Македонија има 9 отсто заштитена зона низ државата, а со прогласување на Шар Планина за национален парк би се зголемило на 12 проценти.
