Стара и обновена кола поголем мерак од нов автомобил. Ова е мотото на 60 годишниот Мурат Садики од Тетово кој меѓу ретките низ градот вози Застава 750-популарно наречено Фиќо од 1981 година.
Иако речиси 40 години е стар автомобилот изгледа одлично откако Мурат потрошил значителна сума пари и време да го поправи изгледот и моторот.
-Јас цел живот возам стари коли олдтајмери. Порано имав фолксваген буба која сега ја има синот. Имам голем мерак да најдам стара кола и да ја обновам. Секако меркот се плаќа. Пошто е стара, колата има потреба од многу одржување што значи и големи трошоци, но јас уживам во тоа. Можеби со тие пари може да се купи и нова кола, но мене ми е задоволство да ја поправам и потоа да ја возам, раскажува Мурат Садики.
Сегашното Фиќо го има веќе три години. Освен со одличен изглед може да се забележи и дека има беспрекорна возна состојба.
-Негде во 2017 година го купив од човек во Кочани. Работев неколку месеци на поправка. Направив целосен ремонт на моторот, ставив нови кожни седишта, ја средив таблата, менувачот и слични потребни. Беше во црвена боја, ама исто го префарбав со нова боја. Ако верувате уживам и само додека го гледам фиќото, вели Мурат.
Секое изглегување од фиќото за Мурат значи нов разговор со нови луѓе кои се заинтересирани да дознаат како успеал да го „дотера“ и така да биде вистинска атракција низ Тетово.
А. С
