Поради пандемијата со коронавирусот годинава наместо Бадниковата поворка на деца се организира поинаков начин на одбележување на овој православен празник. Подготовките се веќе започнати од страна на организаторите навивачката група Војводи и тетовското свештенство при МПЦ.
-Навивачката група „Војводи“ – Тетово во соработка со Тетовско Гостиварска Епархија одлучивме да поставиме две пештери во градот Тетово во кои ќе биде изобразено Рождеството Христово. Почнувајќи од утре (23.12.2020), тие ќе бидат поставени на јавни места, по различни населби. Дечињата ќе можат да се поклонат на нив, но замолуваме да нема групирање за да ги испочитуваме мерките против корона вирусот. Дечињата во нив да оставаат креативни честитки, со молитва кон Новородениот Витлеемски Богомладенец Господ Исус Христос, за скора победа на коронавирусот и молитва за медицинските лица кои се борат против него, како и за тешко болните од него. Оваа манифестација, оваа година ќе биде замена за Бадниковата поворка која годинава поради ситуацијата нема да се одржи. Го молиме Христа, Синот Божји, да не удостои оваа година во мир да го прославиме Божик, со желби вирусот да биде победен, информираа вечерва од навивачката група.
Изминатите неколку години по неколку стотини деца учествуваа на Бадниковата литија и пеењето на песната „Вечниот Бог“. Бадникарски литии се организираа во Тетово и неколку други населени места.
А.С