Промоција на книгата „Тивкиот фронт на Виктор Аќимовиќ“ од авторот, публицистот Бранислав Светозаревиќ се одржи синоќа во Државното музичко училиште во Тетово. Промотори на книгата беа проф.д-р Виолета Ачковска и проф. Оливер Андонов.Станува збор за историско архивистичка книга.
-Виктор Аќимовиќ е роден 1915 во Тетово каде живеел до 1941 година. Починал во Скопје во 1987 година. Тој бил македонски револуционер, деец, подоцна и новинар и фотографски автор. Знаел седум јазици, уште на 19 години имал отворено весник во Тетово, се бори за македонскта кауза. Енигмата кај него е разузнавачката работа за советската служба НКВД. Бил осудуван од повеќе власти, режими и фашистичките окупатори, вели авторот Светозаревиќ.
Авторот Светозаревиќ книгата ја пишува неколку години откакао нашол одреден број документи за Аќимовиќ. Според авторот во тајните служби на неколку држави постојат уште документи за Аќимовиќ што значи дека уште може да се пишува.
-Освен за НКВД се смета дека работел и за британската служба МИ6. Со оглед дека живеел поинаков живот, никогаш не бил разбран во својата средина, но од друга страна преку фотографијата успева да добие врвни награди низ Европа. Понудено ми е сценарио за филм бидејќи тој секогаш бил на линијата на животот и смртта сметам дека живеел налик на Џемјс Бонд. За него постоја документи кои не се достапни во Москва, Лондон и во Софија, рече Светозаревиќ.
Ова е 11-та книга на авторот Бранислав Светозаревиќ, роден 1966 година. Тој е доктор по историски науки, а научно истражувачката дејност ја врши во областите на историјата, архивистиката, музеологијата и културата.