Секторот за внатрешни работи Тетово-Полициска станица за безбедност на патниот сообраќај Тетово ги интензивираше планираните подготвителни активности за непречено и безбедно одржување на традиционалните свечености по повод престојниот православен христијански празник „Голема Богородица“, кои на 27-ми и 28-ми август ќе се организираат во манастирскиот комплекс во село Лешок, информира денес СВР Тетово.
Во рамките на овие активности, покрај другото, се известуваат граѓаните од селата Брезно и Варвара, но и сите други граѓани кои на 27–ми август планираат да патуваат кон овие две села, тоа да го направат најдоцна до 17 часот.
Истото се однесува и на трговците и угостителите, на кои дента им се советува порано да го извршат дотурот на потребните производи. Покрај ова, сите кои со возила ќе пристигнуваат до манастирскиот комплекс се информираат да ги паркираат само на определените локации за таа намена и да ги почитуваат наредбите на полициските службеници кои ќе го регулираат, односно насочуваат движењето на возилата кон манастирскиот комплекс и обратно.
На граѓаните им се препорачува за пристигнување до манастирскиот комплекс по можност да користат возила за јавен превоз, а доколку сепак пристигнуваат со сопствените возила, прописно да ги паркираат, да не ги оставаат на локалниот и регионалниот пат, да бидат трпеливи, непотребно да не брзаат и да не седнуваат зад волан под дејство на алкохол.
Инаку, зависно од моментните состојби и потреби, полициските службеници на Секторот за внатрешни работи Тетово ќе го прилагодуваат и менуваат вкупниот сообраќаен режим на овој потег, во функција на непречено и безбедно движење на сите учесници.
