Тетовската полиција упатува апел до граѓаните сувата вегетација и стрништа на нивите да не се палат за да се избегнат пожари на отворено. Такви примери веќе се забележителни низ тетовскиот регион со оглед дека земјоделците почнуваат да ги расчистуваат нивите во пресрет на подготовките за пролетната сеидба. Поединци ги палат стрништата и сувата вегетација како трева, жбунови и слично, а според СВР Тетово тоа се прави најчесто без нивна непосредна контрола и на тој начин предизвикуваат помали пожари на отворен простор.
-Секторот за внатрешни работи Тетово апелира до земјоделците, но и до сите други да бидат крајно внимателни ако се движат или работат во полето и посебно да не палат огнови, кои брзо можат да се прошират, најмногу ако времето е ветровито. Секторот веќе презема координирани превентивни и други мерки, кои во наредниот период уште повеќе ќе се интензивираат, со цел навреме да се пресретнат можните причини за пожари.Во наредниот период, исто така, координирано со други институции, ќе се засилат и секојдневните контроли на подрачјето, во функција на брзо откривање и ефикасно санкционирање на сите оние кои намерно или од невнимание предизвикуваат полски, шумски или други пожари, вели Марјан Јосифоски, портпарол на СВР Тетово.
Во вакви случаи земјоделците ризикуваат да се соочат со ригорозни законски санкции, односно со соодветни поднесоци.
-Затворските казни за предизвикување пожар се движат од 3 до 8 години согласно член 227 од Кривичниот законик, зависно од видот на пожарот, причините за неговото настанување и другите околности и последици, објаснува Јосифоски.
Тетовската пожарна во 2021 година од вкупно 646 интервенции од кои над 200 ги има направено на пожари што се случиле на шумски предели, обработливо земјиште и полски подрачја.
ас