Градоначалничката на Тетово, Теута Арифи денес ја означи како завршена градбата на мостот што се наоѓа долж патот помеѓу шарпланинските села Шипковица и Бродец. Мостот може да се користи по седум месеци работа откако започна да се гради во април.
-Тука сме да означиме затворање на работите во однос на мостот што ги поврзува Шипковица и Бродец. Ние одамна го направивме овој пат но поради поплавите во 2015 и 2016 овој предел стана проблематичен бидејќи делницата често пати беше во прекин поради одронин на камења и земја, рече Арифи.
Средства за овој мост се обезбедени од општинскиот буџет како и од Бирото за регионален развој.
-Од вкупно 8 милиони денари 3,5 милиони се од Бирото за регионален развој, а останатите од буџетот на општината, изјави градоначалнчката.
Мостот е висок 7 метри, а долг 10 метри. Патната делница Шипковица-Бродец најмногу се оштети при големото невреме и поплави во август 2015 година кога имаше и шест жртви во селото. И по неколкуте реконструкции патот при секој поголем дожд беше оштетуван и небезбеден за движење.