Тетовското основно училиште „Наим Фрашери“ е првото кое во иднина целосно ќе се загрева преку клими инвертери. Овие апарати се поставени како начин на намалување на загадувањето во Тетово, велат од локалната самоуправа.
-Ова училиште е првото училиште каде комплетно се инсталирани инвертери за да се покрие комплетно целиот објект, што значи ова училиште ќе има минимална емисија на штетни гасови, но исто така и битно ги намалува трошоците за греењето. Со исто темпо продолжуваме во другите јавни училишта, истакна градоначалничката Теута Арифи.
Таа денес во ОУ „Наим Фрашери“ учествуваше на дебата со просветниот кадар и учениците за изнаоѓање начини како да се намали загадувањето, но и како се намалат трошоците на училиштата во однос на греењето. Од раководството на училиштето велат дека покрај поставувањето на инвертерите, биле преземени и други мерки за заштеда на енергија.
-И пред 4 години ние ги сменивме светилките со лед диоди, при што го преполовивме трошокот на електрична енергија, а заштедените средства ги искористуваме за нагледни материјали во училиштето. Оваа година сме во контакт со Холандска амбасада и со ЕВН за поставување на фотоволтаични плочки“, вели директорот на училиштето, Џелал Алили.
Покрај ова училиште, вакви клими се монтирани и во објектот на подрачното основно училиште „Братство Миѓени“ кај Спортскиот центар и три објекти на општина Тетово.
А.С