Големо незадолство и револт предизвика судската пресуда за смртта на 32 годишниот Гоце Димитриевски од Тетово во сообраќајка во Скопје, при што тешко беше повредена неговата сопруга Наташа која го загуби и нејзиниот плод. Наташа денес во разговор со новинарите најави покренување постапки затоа што на условно беше осуден скопјанецот кој удри во нив.
Таа е адвокат и сега веќе работи на претставка и против судијката во случајот, Елена Јосифовиќ, и против обвинителката која го водела предметот, Снежана Бундалевска Ѓорѓиевска.
-Ќе поднесам претставка до Судскиот совет во однос на работата на судијката, затоа што сум револтирана од нејзината одлука. Ќе пуштам претставка и до Советот на јавни обвинители во однос на работата на предметниот обвинител, бидејќи моравме самите да ги поправаме грешките и недостатоците во овој предмет, изјави денес Наташа.
Таа аргументира дека ќе ја обжали висината на казната, за која смета дека мора да биде повисока со оглед на кривичното дело и последиците од него. Против обвинителката која го водела предметот, ќе поднесе претставка од неколку причини.
-Прво, обвинителството има рок да донесе одлука по кривична пријава во рок од три месеци или во покомплицирани случаи во рок од шест месеци. Сообраќајката се случи во октомври 2018 година, а јас за првпат дадов исказ дури на 4 јули 2019 година, односно речиси девет месеци по сообраќајката. Тогаш за првпат ја дадов и медицинската документација, изјави Наташа.
Судијата Елена Илиевска Јосифовиќ при Основен Суд Скопје 1 во петокот изрече условна осуда за Васил Ќорбачиев уште на првото рочиште, кое се одржало на 2 септември образложувајќи на семејството на Гоце дека сторителот го признал делото.
Претседателот на кривичниот суд Иван Џолев, во изјава за „360 степени“ вели дека ќе се воздржи од коментар додека не собере повеќе информации за случајот.
-Во моментов немам повеќе информации за пресудата. Таа беше донесена вчера, јас за неа дознав на крајот од работното време. Ќе се интересирам за случајот, од понеделник ќе добијам повеќе информации од судот, по што ќе можам да дадам коментар и став“, вели Џолев.
А.С
