Здружението на Срби и Македонци КУД „Бранко Чајка“ од Тетово вечерва ја организираше манифестацијата „Светосавска радост“. Повод беше одбележување на денот на Свети Сава и завршување на проектот „Школе српског језика“ (школа за српски јазик).
-Школата траеше шест месеци и со оваа е крајна активност. Српскиот јазик го учеа 18 деца-ученици на возраст од 10 до 15 години со Нена Ристиќ Костовска професор по српски јазик и литература од Скопје. Вечерашнава приредба е посветена и на Свети Сава, која во Србија се празнува како школска слава. Воедно децата покажаа што научиле во текот на кратката учебна година, изјави Соња Андонов, претседателка на Здружението на Срби и Македонци КУД „Бранко Чајка“ од Тетово.
18-те учесници во школата добија дипломи и комплети со книги на српски јазик.
-Децата изведоа драмските текстови, посветени на Свети Сава, а еден дел и од она што учеа. Комплетите книги ги добија од врсници од Срвија, собрани во акција за која беше задолжена Олга Сабо од Институт за српски јазик при Српската академија за наука и уметност,рече Андонов.
Проектот е кофинансиран со средства на Управата за соработка со дијаспората и Србите во регионот при Министерството за надворешни работи на Република Србија и е поддржан од Амбасадата на Република Србија во Македонија.
Наредниот период активностите на Здружението се подготвување за настап на фолклорната секција на Здружението на манифестацијата „Денови на културата и традицијата на дијаспората во Ниш“ која ќе се одржи на почетокот на февруари оваа година. На почетокот на месец март ќе учествува на фолклорни средби на српската дијаспора во Инсбрук (Австрија) на традиционалната Пролетна фолклоријада „Заиграј, запеј“.
А.С