10 годишниот Ерденај Сали од Тетово ученик во тетовското музичко училиште “Тодор Скаловски Тетоец“ освои специјална награда на седмиот меѓународен натпревар за млади музичари „Охрид те сакам“.
Тој настапи во натпреварот на дувачки инструменти, а свири на кларинет. Карактеристично е што специјалната награда ја освои меѓу триесетина учесници, а доби по 100 бодови од сите четворица професори членови на меѓународното стручно жири.
Ерденај во државното музичко училиште “Тодор Скаловски Тетоец“ е во класата на професорот м-р Новица Соколовски.
-Ова е огромен успех за нашиот ученик со оглед на добиените бодови, односно по 100 од сите членови на жирито, изјави неговиот професор.
10 годишниот Ерденај е ученик во петто одделение во ОУ Кирил и Методиј во Тетово.