Со двочасовен настап на Хусну Сенлендиричи, Исмаил Тунчбилек и Ајтач Доган членови на Трио Таксим од Истанбул, Турција вчера вечер започна четвртото издание на „Џез фест 2019“ во центарот за култура во Тетово. Тројцата музичари на кларинет, баглама и канун го презентираа музичкото наследство на Турција во џез форма. Во текот на вечерта триото на сцената го повика 10 годишниот ученик Ерденај Салиу од Тетово да настапи заедно со нив со неговиот кларинет.
-Овој четврти по ред „Џез фест“ укажува дека манифестацијата стана сериозен уметнички бренд кој ќе ја промовира џез културата во нашата земја. Тетовскиот џез феставал со својата куса но значајна уметничка биографија е една од манифестациите кај нас кои со одличниот избор на музичари овозможи и Тетово да биде дел од глобалната џез сцена-рече на отворањето министерот за култура Хусни Исмаили.
Вечерва од 20 часот влезот на Џез фест е слободена, а настапуваат браќата Тавитијан, заедно со Рани Круја музичар по потекло од Мароко. Линда Рукај гитаристка од Албанија, настапува во петок од 20 часот со музичари од цела Европа, додека гитаристот Агрон Пени од Косово со бендот на четвртата вечер во сабота во истиот термин. Фестивалот завршува со настапот на музичари од цела Македонија во недела од 19 часот како квинтет заедно со вокалот Нита Речи од Струга.