Бројни награди за освоени први три места на општински, регионални и државни натпревари бележат учениците и нивните наставници од основно училиште „Братство-Миѓени“- објект Спортски центар во Тетово во оваа учебна година.
Помошник директорот Небојша Арсиќ ги потенцира успесите на Елена Трифуноска, осмо одделение која самата има освоено три награди од државни првенства. Таа освои второ место на републичкиот натпревар по физика, како и трети места на натпреварите по биологија и математика. На државно првенство награда има освоено и четврто одделенката Јана Стефаноска, која има второ место на натпреварот по природни науки.
На регионалните натпревари прво место имаат освоено Гораст Марковски (шесто одделение) по англиски јазик, Ана Аврамовска по географија, Татјана Илиевска (седмо одделение) по математика и Елена Трифуноска (осмо одделение) по математика. Втори места освоиле Милош Ивановиќ (шесто одделение) по математика, Мила Глигоровска по математика и Глигорие Гоговски (седмо одделение) по математика, Јана Стефаноска (четврто одделение) по природни науки. Трети места имаат освоено Андреја Петровски, трето одделение по англиски јазик и Марија Јосифоска (четврто одделение) по природни науки.
-Во нашето училиште заедно со подрачното во Сараќино имаме околу 500 ученици од прво до деветто оддление, па самата бројноста создава голема конкурентност и натпреварувачки дух. Сметам дека имаме квалитетен кадар, наставнички од одделенските паралелки чии ученици во шесто одделение се значајно подготвени за следење настава, со стекнати навики за учење и стекнување знаeње. Понатаму наставниците во погорните одделенија максимално се вложуваат во надграбата на учениците со додатна настава и различни видови активности со кои се стекнати и големиот број резултати и награди од државни, регионални и општински натпревари, изјави Небојша Арсиќ.
Во училиштето беше подготвена и невообичаена завршна приредба насловена „Да го оживееме училишното ѕвонче” на која се претставија учениците кои имаат таленти за музика, пеење, сликање, драма и слично.
А.С