Тетовската градоначалничка Теута Арифи најави дека ќе има нова градинка во просториите на основното училиште „Кирил и Методиј“, при денешната посета на објектот Стара градинка каде се врши целосна реконструкција. За новата градинка готова е потребната документација, потенцираше градоначалничката.
Ние во ОУ „Кирил и Методиј“ ја спремивме целата документација, ги издадовме сите дозволи, во комуникација сме со Министерството за труд и социјална политика, во принцип како обврски кои ги имаме сметаме дека евентуално може да има ситни работи кои може да ни бидат побарани. Таа градинка ќе се гради со средства на ИПА фондот, за кои се квалификувала нашата држава и се надеваме дека тоа ќе биде исто така еден голем нов капацитет за децата во општина Тетово, рече Арифи.
Објектот „Стара градинка“ се реконструира веќе еден месец, а прогнозите се дека до крајот на август ќе биде готов.
Се прави темелна реконструкција-ѕидови, електричните инсталации, санитарните чворови и се што е потребно. Со еден збор генерална реконструкција на сите витални системи кои се потребни градинката да биде непречено функционална. Добрата логика на соработка на институциите дава позитивни резултати на терен.Ние ќе продолжиме на овој начин да имаме што е можно подобри инфраструктурни услови, рече Арифи.
Реновираме цел објект благодарение на поддршката на општина Тетово и дел од сопствените средства на градинката , благодариме на градоначалничката што не направи горди што работиме во градинка бидејќи не е лесно да се работи во такви услови да се работи со бројот на деца кои доаѓаат тука. Оваа година децата ќе имаат добри услови и ќе бидат порекласирани и вработени, рече Рамије Даути, директорка на јавната општинска установа детски градински „Младост“ Тетово.
Од двете установи најавија активности и во други градинки со цел подобрување на условите за престој на децата и работа на стручниот кадар.