Македонската православна црква денес го празнува светиот пророк Илија, а четири цркви во Тетовско се именувани по овој светец. Храмови во Стенче, Лукојца (Луковица), Раотинце и Рогачево се посветени на светиот пророк Илија.
-Свети Илија бил пророк силен на збор и голем на дело. Неговото житие раскажува дека тој со бројни чудеса ја покажал силата и власта на живиот Бог: го затворил небото и немало дожд три години и шест месеци; спуштил оган од небото и ја запалил жртвата принесена на неговиот Бог; Го помолил Бога за дожд и заврнало дожд; чудесно ги умножил брашното и маслото во домот на вдовицата од Сарепта и го воскреснал нејзиниот упокоен син; ја прорекол пропаста на непријателите Божји; разговарал со Бога на Хорив и го слушнал гласот Божји во тивкиот нечуен ветар; со огнена колесница се вознел на небото, оставајќи му го пророчкиот дар на својот ученик, светиот пророк Елисеj, вели во илинденското послание поглаварот на Македонската православна црква г.г Стефан.
Митрополитот тетовско-гостиварски г. Јосиф во сослужение со митрополитот Европски г. Пимен денес отслужи празнична архиерејска богослужба во манастирската црква Свети Атанасиј во Лешок.
