Михаела Мишовска 14 годишна ученичка и каратистка на КК Тигар Беловиште изминатиот викенд обезбеди пласман на Европско првенство кое треба да се одржи во февруари 2020 во Будимпешта во Унгарија, а воедно и на Балканското првенство во декември во Словенија.
-Таа се пласираше откако на Државното првенство во Скопје го освои првото место во натпреварувањето во категоријата минус 47 килограми за кадети во кумите индивидуално во женска конкуренција како и првото место во плеј-офот на најдобрите пласирани на прво, второ и две трети места. Михаела го обезбеди пласманот без ниту еден пораз, изјави Живорад Мишовски нејзиниот татко и тренер во карате клубот Тигар.
Првото место на државното првенство значи автоматски пласман и на балканското првенство во Брезице во Словенија во декември. Ова е трето учество на Михаела на Балканско првенство откако лани настапуваше во Белград, Србија и во 2017 во Истанбул, Турција.
Михаела е ученичка во деветто одделение во ОУ Симче Настовски во Вратница, од каде добива голема поддршка од раководството и наставниот кадар за настапување на спортските натпреварувања, потенцираат нејзините родители и тренери Живорад и Сребра.
