Манифестација „Сите на оро“ беше можност вчеравечер во Тетово публиката два часа да ужива во македонскиот и српскиот фолклор во организација на Здружението на Срби и Македонци „Бранко Чајка“-Тетово.
Концертот почна со изведбите на неколку песни на македонски и српски јазик на триото Шербет, а првото оро беше во изведба на најмладите членови на домаќините од КУД „Бранко Чајка“ на безвременската творба „Македонско девојче“.
Домаќините имаа одличен избор на културно-уметнички друштва кои одиграа десетина српски традиционални ора, за кои беше споменато дека од 2017 година се дел од репрезентативната листа на УНЕСКО за нематеријално културно наследство на човештвото.
Наградата од публиката со аплаузи беше потврда за одличниот настап на српските играорци. КУД „Цветко Грбиќ“ од Штрпце, Фолклорен ансамбл „Севдах“ од Врање и КУД „Соко“ од Бујановац настапија со повеќе ора од нивните краишта, за што беа наградени со силни аплаудирања од публиката.
На крајот од оваа ревија на фолклор како што и беше насловена „Сите на оро“ сите играорци заедно одиграа орото „Чачак“.
ас