Граѓаните од повеќе населби во градот изразуваат загриженост дека и покрај уредна документација за гаражи Општина Тетово има намера истите да им ги отстрани. Загриженоста доаѓа по средбите со градоначалникот и со инспектор, каде било доставена и приложена документација.
Граѓаните, сопственици на гаражи со уредна документација поставени зад зградите на булеварот „Благоја Тоска“ информираат дека организирале средба на која е договорено дека ќе се користат правните инструменти за заштита на нивната сопственост.
„Граѓаните изразуваат загриженост од односот на општина Тетово која пред неколку дена со известување залепено на секоја од гаражите ги информираше дека истите имаат рок од 7 дена да ги отстранат гаражите или во спротивно општината ќе пристапи кон нивно рушење. Она што ги разликува овие граѓани што поседуваат вакви објекти од остатокот на градот каде што се постапува е тоа што истите имаат уредна документација (протокол, одобрение за градба и решенија) уште од 80-тите години од минатиот век. Исто така во постоечкиот урбанистички план на ова место сè уште фигурираат гаражни места, па оттаму и загриженоста од ваквата постапка. Сопствениците на гаражи имаат намера да ангажираат и правен тим за одбрана на нивните права. До сега од правната фела добија мислење дека е незаконски е да се постапува сè додека за тој дел не се донесе некој нов урбанистички план. Во иднина се надеваат дека ќе бидат консултирани преку анкета, јавна средба или дебата од страна на општината за тоа што на овој дел се планира да се направи, се вели во дописот на граѓаните до редакцијата на Тетово инфо.
До Општина Тетово, упативме барање за одговор зошто се бара од граѓаните да се отстранат гаражите и покрај соодветна документација и која е причината за барањето на инспекторатот да се отстранат гаражите, според кое решение или Детален урбанистички план постапува Општината. Одговорот ќе биде објавен доколку пристигне од Општина Тетово.
ас
