За пребрзо возење во текот на март 2022 полицајците од Тетово изрекле казни за вкупно 793 возачи. Оваа е зголемување од околу 30 отсто во споредба со март 2021 година кога имало 231 казна помалку.
-Возачите ја пречекориле максимално дозволената брзина, најмногу на тетовскиот дел од автопатот Гостивар-Тетово-Скопје и низ тетовските улици. На пребрзите возачи во овој период изготвени им се поднесоци, а оние со најголеми пречекорувања ќе се соочат и со мерка времено одземање на нивните возачи дозволи од три месеци до една година. Во периодот за кој станува збор, исто така, споредено со минатогодишниот март, санкционирани се и поголем број возачи кои ги управувале возилата без положен возачки испит и валидна дозвола, вкупно 142, односно 53 повеќе. Најмногу од нив управувале патнички моторни возила и мотоцикли, информира Марјан Јосифоски, портпарол на СВР Тетово.
Тој вели дека Секторот за внатрешни работи Тетово континуирано спроведува превентивни и други активности, во рамките на кои посебен фокус се возачите кои се движат со поголема брзина од пропишаната и без возачка дозвола, а кои се планирани и наредните месеци.
Според портпаролот во март на ова подрачје најчести причини за случените сообраќајни несреќи се токму неприлагодената брзина и неправилно вршење на дејствие, пред се на градските улици и автопатот.