Ни една фирма од дрвната индустрија во Тетовско не добила субвенција за поставување филтри на минатогодишниот повик на Министерството за животна средина и просторно планирање. Заменик министерот Јани Макрадули истакна дека тоа било поради неисполнетите услови, иако од фирмите се барало само да ги имаат платено сите давачки кон државата.
-Аплицираа но не ги исполнуваа условите. Можеби Северозападната Комора требаше да има позначајна улога. Апелиравме, промовиравме, се продолжи рокот но ништо. Таа работа да се искористи бидејќи има 30 компании кои користат отпад од свое производство за загревање, изјави Макрадули на новинарските прашања на вечерашната трибина на СДСМ „Агенда-Воздух 20-24.
Макрадули вели дека во 2020 година ќе има нов повик.
-Новиот повик ќе биде не само за фирмите од дрвната индустрија туку и за другите индустрии за повеќе мали и средни компании да можат да аплицираат, рече Макрадули.
Околу мерката за субвенционирање на граѓаните за набавка на инвертер системи Макрадули рече дека треба да се состави соодветната комисија но дека средствата се префрлени до општините кои на седници на Советите треба тоа да го прифатат и објават.
А.С