Огромен број тетовци денес на социјалните мрежи изразуваат поддршка и зборови на среќа и гордост за Самир Љума од Тетово, кој е дел од екипата која го снимаше документарецот Медена земја“, по денешното номинирање за добитник на најпрестижната филмска награда Оскар.
Самир Љума заедно со Фејми Даут беа сниматели на филмот. Самир веќе долги години се занимава со филмска камера и фотографија.
Документарниот филм „Медена земја“ го режираа Тамара Котевска и Љубомир Стефанов. Филмот на 12 октомври 2019 беше прикажан за прв пат во Тетово. Беше прогласен за најдобар филм на 8-то издание на Тетовскиот интернационален филмски фестивал ОДА.
-Драго ми е што со филмот се прикажа тука во Тетово, каде беа моите филмски почетоци во драмското студио. Штета што и Атиџе од филмот не беше тука да ја сподели радоста за наградата, рече тогаш Самир.
Тој е роден и живеел во Тетово, а потоа во Скопје и надвор од Македонија. Неговите родители живеат во Тетово.
„Медена земја“ е номиниран во две категории: најдобар документарец и најдобар странски филм. Наградените ќе бидат познати на 9 февруари на прогласувањето во Лос Анѓелес.
-Ова е прв пат документарен филм да е номиниран во две категоии што значи успех со историкси размери, напишаа од екипата на филмот на нивната Фејсбук страница.
Досега само Милчо Манчевски со „Пред дождот“ бил номиниран за Оскар во самостојна Македонија, додека во рамки на Југославија номинација имал и Столе Попов за документарниот филм ДАЕ.
