Типикот на Македонската православна црква или правилата за богослужба и живеење на верниците налага за прв пат грозје да се јаде на празникот Преображение. Овој празник се одбележува секој 19-ти август во време на Богородичните пости.
-Грозје за првпат се јаде на празникот Преображение, и тоа не е бабина деветина, туку дел од типикот на Православната Црква. Од грозјето се прави вино, а виното е евхаристиски дар, и затоа треба да се благослови прво новата реколта во Црква на Преображение, а потоа да се јаде, објаснува протојереј Александар Стојановски од тетовското архирејско намесништво.
На денот на одбележување на празникот во склоп на литургијата се благословува грозјето со посебна молитва за таа намена. Свештеникот излегува пред царските двери каде што се поставени садови со грозје и ја чита молитвата за благословување на грозјето. Потоа се дели нафора со грозје.
Празникот Преображение Господово спаѓа во големите празници што ги празнува Светата Христова црква.
.